تسجيل الدخول لسرعة الوصول إلى أفضل الصفقات. انقر هنا إذا لم يكن لديك حساب.

عشر خطوات لجعل مساحتة الصغيرة تبدو كبيرة

منذ سنة أفكار متنوعة   1.1K المشاهدات
img

5.0 نجوم

من بين كل ألغاز التصميم الداخلى دا واحد من أفضل الأمثة على كدا

أكيد في حاجات بسيطة وواضحة ممكن نعملها عشان نوسع أوضة زي الضوء الطبيعي و اختيار ألوان محايدة واستخدام المرايات فأماكن معينة

بس المهم ازاي نخلى كل العناصر دي تشتغل مع بعض وهو دا المطلوب


واحد : الأرضيات

 ستايلات الأرضيات المختلفة  بتحدد المساحات بشكل كبير بس ممكن كمان تخلي غرفة صغيرة تبان أصغر

لو كان عندك الأرضيات خشبية  مثلا، استعمل ألواح تبليط أوسع ، واختار تصميم بلاطات كبيرة بحيث تشوف أقل فواصل ممكنة في الغرفة، دا حيخليك تشوف أرضية الغرفة أوسع.

ممكن تفرش سجادة مستديرة, حتعمل ربط كويس بين قطع الأثاث و لو حتبقى سجادة تقليدية حاول تكون صغيرة عشان تظهر مساحات بينها وبين قطع الأثاث.

ملاحظة* : مهم جداً ان السجادة متوصلش لتحت الكنبة لأنه حيخلى الأوضة مشدودة بصرياً.

 

اتنين : الحوائط

معروف إن الضل الخفيف في الغرفة بيخليها تبان أكبر وأفتح

الدهانات الفاتحة للحوائط بتديها انعكاس طبيعي وكمان بتزود احساسك بالضوء الطبيعي في المكان

لما تيجي تختار الألوان خلى التباين بسيط بين الأسطح المختلفة

بمعنى أن ألوان الحوائط والأرضيات تكون من نفس الدرجات الأساسية

tonal family

وبكدا تكون خلقت توازن وهارموني كويس.

ملاحظة* : دهان الوزرات و فريمات الأبواب بدرجة أخف من الحوائط حتأكد شعورك بالوسع الى انت شغال عليه.

 

تلاتة : الشبابيك

أكيد واضح ان الشبابيك هى الى بتدخل الضوء الطبيعي, ولكن لو بتعيش فمكان بيجبرك انك تقفل الشبابيك أو تغطيهم بستاير طول النهار أو فأوقات معينة من النهار

خلى لون الشباك من نفس لون الحوائط عشان يبقى في انسجام والستاير خليها عالية و نازلة لحد الأرض بحتة زيادة كدا حتديلك احساس بارتفاع الغرفة.

ملاحظة* : أبلكانة الستارة خليها متعلقة في السقف بدل الحيطة وخليها ممتدة على طول الحيطة وبكدا حتبقى عملت شلال من القماش الجميل.

 

أربعة : المرايات

المرايات اختيار واضح عشان تخلي الضوء الطبيعي المتاح عندك يرتد فكل أنحاء الغرفة.

الحيطة المتغطية بمراية بقى حل كلاسيكي وتقليدي , لكن مرايتين أو تلاتة كبار على الأرض حيقومو بالواجب ولكن دا ختيار فأغلب الأحيان بيكون صعب.

ملاحظة* : لما تحط مرايا إتأكد ان مكانها حيخليها تعكسلك شباك أو منظر معين عشان تديلك إضاءة ووسع أكتر.

 

خمسة : وحدات الإضاءة

الضوء الطبيعي واحد من أكتر الطرق تأثير في خلق الإحساس بالوسع , ولكن لما الدنيا تليل إيه الى حيحصل ؟

للمساحة الصغيرة الموضوع كله فى الاختيار الصحيح للإضاءة وتأثيرها على المكان

حط وحدة إضاءة أرضية رفيعة ترمي ضوء رفيع على الحيطة

ملاحظة* : إختار وحدة إضاءة أرضية يكون الفريم بتاعها صغير وأبسط ما يمكن عشان ميعملش زحمة في الأرضية.

 

ستة : الأبواب

الأبواب الداخلية وأبواب الدوايب ممكن تاكل مساحة كبيرة وساعات ازالة باب بيبقى حل كويس لو مكنش الباب الجرار حل ممتاز حيرجعلك متر زيادة في الفراغ , كل سم مهم مش عايزين نضيعه.

ملاحظة* :الأبواب الحصيرة أو الأوكارديون جميلة ولكن بتكون أحلى لما متبقاش من مادة متناقضة مع الى حواليها عشان متفصلش خط الرؤية. 

 

سبعة : الرفوف

الأرفف من الأرض لحد السقف طريقة كويسة عشان تديلك احساس الإرتفاع وتخلى عينك تطلع لأعلى مكان في الغرفة دا غير انك حيبقى عندك مكان ممتاز للتخزين وخصوصاً إن دا مش بيبقى متوفر في الفراغ الضيق.

إعمل مجموعة رفوف مابين المفتوحة والمقفولة لو كلها مفتوحة حتعملك تشويش بصري مهما صغرتها وبردو لو عملتها كلها مقفولة حتفقدلك شخصية التصميم.

ملاحظة* : إعمل رفوف في أماكن غير متوقعة زي طرقة المدخل أو فوق باب المدخل أو تحت دراع الكنب.

 

تمانية : الأثاث

الكنب المفروش والتصميمات الغريبة ملهاش مكان في بيت صغير فسيبك من كل دا وإشتغل على الى جاي

الكنب : إختار كنبة مرتكزة على أرجل ومرتفعة عن الأرض بحوالى 10 سم و دراعاتها منخفضة.

ترابيزة السفرة: ترابيزة دائرية حتاخد مساحة أقل و مفيهاش زوايا حادة فمش حتقطعلك حركة المرور في المكان,, وياريت تكون خفيفة و من فوق تكون من مادة عاكسة زي الرخام أو الزجاج.

الكراسي : اتجنب الكراسي الى رجليها منفوخة لبره واتأكد ان ضهر الكرسي مش مرتفع لدرجة فوضوية أو يداري منظر معين في الغرفة.

ترابيزة القهوة : مفيش ترابيزة قهوة ؟ معقول ؟!! لو عايز تخلي الدنيا مفتوحة بصرياً وعملياً استعمل اختيارات مناسبة من الترابيزات الجانبية بدل ترابيزة القهوة.

 

تسعة : البراويز

البراويز بتلعب دور مهم في نسب و حجم الغرفة, لكن لما تكون فوق مستوى نظرك حتديلك احساس بالإرتفاع والمساحة,استخدم مجموعة من أحجام و مواد مختلفة.

إبدأ بالقطعة الأكبر وبعد كدا حط حواليها تلت أربع قطع أصغر.

ملاحظة* : لو حتحط البراويز فوق الأثاث فكر أزاى حتربط الدنيا ببعضها وكأنك بترسم لوحة مصغرة .

 

عشرة وأخيراً : قطع الديكور

لو بيتك ضيق ومفيهوش مساحة ,التماثيل والفازات المعقدة مش حتساعد, حط القطع الى انت بتحبها فعلا واتخلص من الباقي.

اختيار الأماكن مهم والسر في انك تخلق توازن بصري بين القطع الى انت بتحبها و بين المكان الهادي الى حتختاره.

ملاحظة* : لو عندك انتيكات وفازات كتير بتحبها وبدل ماتحطها في البيت كلها وتكركبلك الدنيا ,, كل كام أسبوع غير فيهم وغير في أماكنهم بحيث يبقى عندك كل مرة قطعة مهمة في مكان مهم وبكدا تكسر الملل.

معلومات عن الكاتب : 

حسام الدين محمد - مهندس معماري

شاهد أيضاً

  أفكار تخزين للمساحات الصغيرة

     

وضع تعليق (1)

ملاحظة: يجب ان تكون مسجلاً لكي تنشر تعليقك .


مجهول منذ سنة

مقالة مفيدة جدا